L’Archivu de Música d’Asturies ye una unidá de xestión documental de la Biblioteca d’Asturies "Ramón Pérez de Ayala", dependiente del Serviciu de Promoción Cultural y Biblioteques de la Vicesonseyería de Promoción Cultural y Política Llingüística de la Conseyería de Cultura y Turismu del Principáu d’Asturies.

L’Archivu de Música d’Asturies naz nel añu 1993 y ye resultáu del alcuerdu ente la Fundación Príncipe d’Asturies y la Caxa d’Aforros d’Asturies (anguaño CaxAstur). El determín d’entrambes instituciones foi dotar al Principáu d’Asturies d’un centru de compilación, caltenimientu, estudiu y difusión del patrimoniu musical asturianu, asemeyáu a los qu’hai n’otres comunidaes autóNombres. El 9 de febreru de 1996 la Fundación Príncipe d’Asturies, la Caxa d’Aforros d’Asturies y la Conseyería de Cultura firmaron un conveniu col que la Conseyería de Cultura pasaba a facese cargu del Archivu de Música d’Asturies. La Fundación Príncipe d’Asturies y la Caxa d’Aforros d’Asturies tresferíen el so llabor pioneru y dinamizador de la cultura musical asturiana, dexando abierta la posibilidá de participación futura de dambes instituciones nel desenvolvimientu de los oxetivos del Archivu de Música d’Asturies xunto a la Conseyería de Cultura.

De magar se creó, les llinies de trabayu del Archivu de Música d’Asturies podíen resumise, uno, na recuperación, catalogación, clasificación y estudiu de los fondos musicales asturianos y, otro, na difusión d’esti patrimoniu,

Pa encarase con garantíes a estos determinos, l’Archivu de Música d’Asturies tien subvencionao proyectos d’investigación sobre dellos aspectos de la música asturiana: bibliografía, discografía, hemeroteca o’l trabayu n’archivos públicos y privaos.

La divulgación del patrimoniu musical asturianu fíxose cola programación de conciertos y la publicación de catálogos y monografíes. Esti llabor tuvo como denominador común la promoción d’obres d’autores asturianos.

L'Archivu de Música d'Asturias -que dende l'añu 2001 ta na Biblioteca d'Asturies "Ramón Pérez de Ayala"- dispón d'un númberu bien importante de documentos. Les sos 14.740 referencies bibliográfiques puen consultase na so base de datos llamada "Musicae". El llabor del Archivu de Música d'Asturies foi reconocíu pol

públicu na esposición: "Musicae. Muestra del Archivu de Música d'Asturies", que se fixo n'Uviéu ente'l 28 d'ochobre y el 19 de payares de 1995 y que foi inaugurada pola S.A.R. el Príncipe d'Asturies.

L’Archivu de Música d’Asturies tien encomendaes –con calter xeneral– les funciones de compilación, archivu, investigación y difusión de tol material que pudiere tar rellacionao cola música d’Asturies.

Con calter específicu, l’Archivu de Música d’Asturies –tanto na so faceta d’archivu como na de centru de documentación– tien encomendaos, ente otros, estos oxetivos:

	a)	Recuperación del material musical producío n’Asturies en toles sos formes: partitures, grabaciones sonores y audiovisuales, manuscritos y toles menes de documentos rellacionaos cola materia, tanto los creaos por autores asturianos como los creaos por autores d’otres comunidaes que la so obra pueda considerase de conteníu asturianu.
	b)	Caltenimientu de los sos fondos: cuidáu, catalogación y clasificación de les obres.
	c)	Investigación del acervu musical asturianu.
	d)	Difusión del patrimoniu musical asturianu qu’hai nos fondos del archivu y de los trabayos d’investigación que se faigan.
	e)	Censáu de los recursos musicales qu’hai en cada momentu n’Asturies y difusión de los mesmos.

El llabor del Archivu podría resumise, polo tanto, na recuperación, conservación, catalogación, estudiu y difusión de la música de conteníu asturianu poniendo a disposición de los usuarios –investigadores,

estudiantes, músicos, docentes o cualquier otra persona interesada– los fondos musicales qu’hai en cada momentu.